AZORES seu FLANDRICAE

AZORES, seu FLANDRICAE
olim Cattiterides. Ptol. vel Cassiterides insulae, Plin l. 4. c. 22. dictae, septem sunt, S. Mariae, S. Michaelis, Tertiaria seu Tercera, Gratiosa, S. Gregorii, Pici, Faial, quibus accedunt aliae geminae Florum et Corvi: quae quidem a ceteris remotiores, et ob id piratis expositae, olim inter Azores non numeratae, hodie tamen eidem dominio Lusitanorum subsunt: ita et universae iam novem statuuntur, sitae in mari Atlantico. Solum saxosum, at fertile, inprimis fructus Batatas, incolis in delitiis ferax. Boves harum Insularum, magni in Europa nominis sunt. Glasti quoque hîc vis ingens. Azores ab accipitribus seu nisis, qui primô inventionis tempore magnô ibi numerô videbantur, dicuntur. Flandricae quoque nuncupantur a Flandris Belgis, qui primi insulam Faial incoluerunt, A. C. 1449. Boter. quorum adhuc certae familiae inibi illustres sunt, Belgarum ingenium, mores et consuetudinem apprime repraesentantes, torrentique loco, quem incolunt, manet nomen Flandrorum, vulgo Ribera de Flamencos dicitur. Eius caput est Tercera, in qua Angra, urbs praecipua et Episcopalis. Metel. Hollandis de Ulaempsche Eylanden, mediô inter Europam et Americam situ, e regione Portugalliae. Descriptae sunt peculiariter a Lud. Tersera, cui adde Linschotum part. 2. c. 6. p. 39. et Auctorem Anonymum Hist. Orbis Terr. Geogr. et Civ. cui Veter. Cassiterides sunt Sullingae, the Sorlinges, e regione Cornubiae promontor. Lislaei, inter insulas minores Hiberniae et M. Britanniae adiacentes, vide in voce Cassiterides vel Cattiterides.

Hofmann J. Lexicon universale. 1698.

Share the article and excerpts

Direct link
Do a right-click on the link above
and select “Copy Link”

We are using cookies for the best presentation of our site. Continuing to use this site, you agree with this.